كيف تتقن صلاة الجمعة على المنهج المصري في 5 خطوات ؟

لأن الشعب المصري متدين بطبعه .. فالكل لازم يسعى إنه يطبق الدين بالشكل المصري الجميل.

فيما يلي5 خطوات عشان تتقن صلاة الجمعة على المنهج المصري السليم ...

1. تخطَّى كل الصعاب!

لو وصلت متأخر مافيش مشكلة .. ادخل و العب لعبة "قفز الحواجز مسافات قصيرة"  لحد ما توصل للصفوف الأمامية عشان تاخد الثواب .. و بالنسبة للي لطشتهم بالقفا برجلك ممكن اللي لطشته على قفاه تقوله لا مؤاخذة وتكمل طريقك عادي

2. اخلق مساحتك الخاصة!

 لو وصلت متأخر والصفوف الأمامية اتزحمت .. ما تُحبطش .. اوعى تسيب الثواب يروح منك .. هتلاقي 10 سنتيمتر مربع بين شخصين .. حاول تقف فيهم .. و اخبط على كتف الشخصين وشاورلهم إشارة معناها إنهم يوسعولك شوية .. ممكن يبصولك شذراً .. عادي .. تنَّح .. هيوسعولك في الآخر .. ما تقعدش بقى على طول .. صلي ركعتين .. و انت بتصلي هتفضل تخبط فيهم فهيضطروا يوسعلوك أكتر .. مبروك لقيت لنفسك مكان في الصفوف الأولى .. عاش!

3. آآآآآآآآآآآآميييييييييييين!
 الصلاة بدأت .. ركز أوي أثناء قراءة سورة الفاتحة .. أول ما الإمام يقول: "ولا الضالين" جهز حنجرتك و قول: "آمين" بأعلى صوت عندك و أطول مد في الحروف تقدر عليه ... كده كل الناس هيقولوا عليك راجل تقي و وَرِع .. مبروك!

4. الله أكبر!
 كل تكبيرة بيقولها الإمام رددها وراه بصوت عالي .. سيبك من اللي بيقولوا إن الصلاة جهرية للإمام فقط مش ليك .. لازم تثبت نفسك إنك أتقى واحد في قلب المكان!

5. الهاتف المحمول!
 سيبك من موضوع إنك تعمل الموبايل صامت .. اشمعنى انت يعني؟!
احتمال الإمام يقول للناس قبل الصلاة اقفلوا الموبايل أواعملوه صامت .. سيبك منه هو ماله هو؟!
ممكن بس لو رن أثناء الصلاة تقفل الصوت .. بس مش شرط يعني عادي براحتك .. خصوصاً لو الرنة دعاء أو أغنية محمد فؤاد بتاعت مسلسل الشعرواي .. كده انت في السليم.


لو أتقنت ال5 خطوات دي أقدر أقولك مبروك .. انت كده أتقنت صلاة الجمعة على المنهج المصري السليم .. بارك الله فيك أخي الكريم.

الكورة مش مع عفيفي .. عندما يقتحم التحليل الكروي اليوتيوب

الكورة مش مع عفيفي .. هو برنامج متخصص في تحليل مباريات فريق نادي الزمالك الكروي .. يكتبه و يقدمه كاتب زمالكاوي شاب اسمه "أحمد عفيفي" .. و هو أحد الكتاب في موقع "زمالك تي في Zamalek.tv" أحد أكبر المواقع الرياضية المنتمية لنادي الزمالك، و يقوم بمهمة الإخراج الفني أحد الأعضاء القدامى في منتدى نفس الموقع و هو "محمد مجدي".

لوجو البرنامج

البرنامج يُبث عبر موقع "يوتيوب" فقط، و يتحدث بلسان مشجع زمالكاوي، لا يقتصر على التحليل الفني للمباريات فقط لكن قد يتحدث عن بعض القضايا الكروية الأخرى من آن لآخر مثل حديثه عن اعتزال ميدو لاعب الزمالك السابق ومدربه الحالي، أو عن رأيه في شيكابالا لاعب الزمالك السابق أو أبو تريكة لاعب الاهلي المعتزل حديثاً.

أحمد عفيفي هو أحد كتاب المقالات في الموقع الزمالكاوي الشهير، كان ذلك قبل أن ينصبّ تركيزه على برنامجه الجديد، أما محمد مجدي أو "Kan Zaman" كما أطلق على نفسه  فنشاطه الأبرز هو إنتاج فيديوهات تتواكب مع انتصارات فريقالزمالك أو حتى هزائم الأهلي المنافس التقليدي للزمالك.

تم الإعلان عن البرنامج ببرومو بسيط نُشر يوم  4 فبراير 2013 و كانت أولى حلقات البرنامج في نفس اليوم و تم فيها تحليل مباراة للزمالك ضد الاتحاد في الدوري المصري.

يتم نشر حلقات البرنامج على القناة الخاصة بموقع زمالك تي في، و يتم نشر الحلقات أيضاً على موقعي فيلجول و ياهو.

تزايدت شعبية البرنامج في الفترة الأخيرة و أصبح الكثيرون من مشجعي الزمالك ينتظرون الحلقة بعد كل مباراة ، و زاد تأثير البرنامج حتى أنه في إحدى الحلقات الأخيرة انتقد عفيفي لاعب الزمالك "عمر جابر"، و في المباراة التالية و التي فاز بها الزمالك أعلن "جابر" بعد المباراة عن نيته الرحيل عن الزمالك بعد ما اعتبره حملة هجوم غير مبرر ضده، و هو ما دفع البعض لتفسير ذلك بهجوم عفيفي بالذات عليه و دار جدل بين جماهير الزمالك حول الموضوع و هاجم البعض عفيفي، لكن انتهى الأمر سريعاً بعدما أعلن اللاعب في وقت لاحق استمراره مع الفريق.

يوم 24 يناير 2014 (أي بعد عام كامل من بداية بث البرنامج!) تم إنشاء الصفحة الخاصة بالبرنامج على الفيسبوك  و كتب صناع البرنامج في وصف الصفحة "الكوره مش مع عفيفي .. برنامج زمالكاوي غير محايد".

إحصائيات يوتيوب

- عدد المشتركين في قناة زمالك تي في 66,114

و العدد الإجمالي لعدد مشاهدات الفيديوهات على القناة 29,245,180

ملحوظة: القناة لا تختص ببرنامج الكورة مش مع عفيفي فقط بل تقوم بنشر العديد من الفيديوهات الكروية و الزمالكاوية بشكل رئيسي بطبيعة الحال.

- عدد الحلقات بلغ حتى الآن : 65 حلقة

تم إنشاء قائمة تشغيل (Playlist) لجمع كل الحلقات في مكان واحد لكن لا يتم تحديثها بشكل سريع، بالإضافة لعدم وجود قناة خاصة بالبرنامج وهو ما يصعب من تحليل أداء البرنامج رقمياً بشكل دقيق.

- أكبر عدد من المشاهدات كان للحلقة الخاصة بتحليل مباراة منتخب مصر ضد منتخب غانا في تصفيات كأس العالم 2014، و بلغت 96 ألف مشاهدة، تلتها مباراة الزمالك و الأهلي في دوري أبطال أفريقيا العام الماضي.

- يوم 11 مارس الماضي أعلن عفيفي عبر صفحة البرنامج على الفيسبوك وصول عدد المشاهدات لحلقات البرنامج لـ 2 مليون مشاهدة.

إحصائيات فيسبوك :

- Likes : 80,451

- People Talking about this : 7,712

- 85% من المعجبين بالصفحة من مصر، 4% من السعودية، ثم الكويت و العراق و الإمارات.

- يزداد المعجبون بالصفحة بمعدل 47 معجب يومياً.

- عدد متابعي الصفحة الشخصية لأحمد عفيفي على الفيسبوك 5,715

عدد متابعي أحمد عفيفي على تويتر 6,691

معدلات البحث عن "الكورة مش مع عفيفي" على موقع جوجل

معدلات البحث عن "الكورة مش مع عفيفي" على موقع يوتيوب

شعبية البرنامج قائمة بالكامل على واحدة من أبرز الشبكات الاجتماعية و هي موقع يوتيوب، لكن رغم ذلك فإن أداء البرنامج على الشبكات الاجتماعية بشكل عام يشوبه عدد من السلبيات والتي إذا تم التغلب عليها أتوقع أن تتضاعف شعبيته و يتطور أداءه، سأحاول أوجز ذلك في عدة نقاط.

- البرنامج يتم بثه على اليوتيوب عبر قناة موقع "زمالك تي في" و ليس للبرنامج قناة خاصة به، أقترح إنشاء قناة مستقلة خاصة بالبرنامج. أتفهم ولاء القائمين على البرنامج لموقع "زمالك تي في" ورغبتهم في استغلال شعبية البرنامج في زيادة شعبية الموقع، لكن البرنامج تجربة قائمة بذاتها خرجت بمجهود ذاتي من صانعيه و يستحق تسليط الضوء عليه بشكل أفضل خاصةً و أن الفكرة جديدة في الوسط الرياضي المصري و غير مسبوقة.

- صفحة البرنامج على الفيسبوك تحتاج إلى المزيد من التفاعل مع زوارها مثل فتح النقاش قبل الحلقات و بعدها و تقييم الحلقات.

- استخدام "هاشتاج" خاص بالبرنامج سيكون مفيد بشكل كبير، و استخدام هاشتاج مميز حسب كل حلقة سيزيد أيضاً من انتشار البرنامج ( حدث ذلك مرة واحدة في هاشتاج #لا_لمرتضى_منصور )

- البرنامج يحتاج إلى فريق عمل يدير عملية تسويقه على الشبكات الاجتماعية بشكل كامل، فكما قلت البرنامج رصيده بالكامل ينبع من جمهور الشبكات الاجتماعية.

- الاهتمام بتطوير الشكل الفني الخاص بالحلقات نفسها شديد الأهمية، سواء على مستوى الصوت أو الصورة و يمتد ذلك إلى الصور والتصميمات المستخدمة على صفحة البرنامج على الفيسبوك أو غيره من المنصات الاجتماعية.

يبقى القول أن برنامج "الكورة مش مع عفيفي" فتح الباب للمزيد من هذه من النوعية من البرامج الرياضية التي تعتمد بشكل أساسي على موقع "يوتيوب" و الذي أتاح للكثيرين إظهار مواهبهم المختلفة و الانتقال من الهواية للاحتراف، و ليست تجربة باسم يوسف عنا ببعيدة.

تحديث :
ميدو - المدير الفني لفريق الزمالك لكرة القدم - يلتقي بأحمد عفيفي مقدم البرنامج لمناقشة مستقبل الفريق.

كتابات عن البرنامج

http://almogaz.com/news/sports/2014/02/16/1340985 

السيسي إلهاً

يبدو أن مسألة ترشح الجنرال الخارق عبد الفتاح السيسي لرئاسة الجمهورية أصبحت أمراً مفروغ منه، و فوزه أصبح أمراً في حكم المؤكد، فوجب علينا أن ننتقل إلى صميم الموضوع و نبدأ في الحديث عن إعلان سيادته إلهاً جديداً للمصريين.

إليك بعض دلائل انتشار الديانة السيساوية في أم الدنيا اللي هتبقى قد الدنيا 

السيسي الواحد القهار !

طواف بعض المواطنين حول صورته ثم السجود أمامها (أو تقبيلها) 

بيع تماثيله في الشوارع لتسهيل التقرب إليه

باركوا أولادكم ببيادته

كما تم إطلاق حملة شعبية على موقع "فيسبوك" لنشر الدين الجديد .. و جاء في تعريف الحملة :

لماذا الحملة الشعبية لتأليه الفريق أول لا ثاني له عبدالفتاح السيسي؟ 

- الفريق السيسي حصل على 98% في الاستفتاء الأخير الذي شارك فيه 20 مليون مصري. وهو الاستفتاء الذي إذا أقيم على أي دين أو عقيدة أو فكرة أو شخص فيستحيل أن يحصل على هذا الكم من التأييد. 

- الفريق السيسي منزه عن الخطأ. ما هي آخر مرة سمعت عن انتقاد لسيادة الفريق في أي وسيلة إعلام مقروءة أو مسموعة أو مرئية؟ 

- الفريق السيسي أحاط بكل شيء علما: فهو مطلع على ما في يدور بين المرء وزوجه. فلديه فريق عمل يقوم بتسجيل كافة المكالمات لجميع المواطنين ولديه مواطنين شرفاء يرصدون له كل التحركات في كافة أنحاء المعمورة.

- الفريق السيسي مجيب للدعوات: كلما دعاه الشعب للتدخل سارع بتلبية النداء. على عكس الكثير من الآلهة الأخرى التي تقوم بسؤالها ليل نهار ولا تجيبك على تساؤلاتك. 

- الفريق السيسي هو المخلص: أنقذ شعبه من الإخوان وتجار الدين ونشطاء السبوبة والطابور الخامس وأمريكا وقطر وإسرائيل وإيران وتركيا وجزر الباهاما.

- الفريق السيسي كتب على نفسه الرحمة: فهو العطوف الودود (الحووووونين) كلما تحدث إلى شعبه.

- الفريق السيسي طبع له بوسترات أكثر من بوسترات حازم صلاح أبو إسماعيل.

- الفريق السيسي مُؤيد من المدام إيمان عبدالعزيز

أحد استطلاعات الرأي بين أعضاء الحملة :

لو اختار السيسى عز و جل رسولاً من اول شخصيه سيختارها ..؟

و فاز الصحفي مصطفى بكري باللقب باكتساح

كما سأل أحد المشاركين قائلاً :

 مع فقرة "اختبر معلوماتك الدينية" : ماهي علامات قيام الساعة الاوميجا؟؟؟

جدير بالذكر أنه قد قام رئيس الجمهورية المؤقت بترقية السيسي إلى رتبة مشير ، و هو ما يؤكد أن عملية تأليهه تسير في طريقها الصحيح

من فساد قطاع الإسكان في مصر

أنا مش هاتكلم عن حاجات سمعتها او قريت عنها أو حصلت لحد اعرفه ..

انا هاتكلم عن حاجة حصلت معايا شخصياً ..

في يوم من الايام ليس بالبعيد أبويا اشترى قطعة أرض صغيرة في مدينة الشروق زي عائلات كتير في مصر ما بتعمل كده في السنين الأخيرة ... تقعد تحوش طول عمرها بعد السفر بره مصر ثم العودة ثم الكفاح عشان لقمة العيش .. و بعد عشرات السنين اللي ربنا بيكرمه و يحوش شوية فلوس .. بيروح شتري قطعة أرض "يختلف مكانها و مساحتها حسب القدرة المالية للمشتري" .. يبنيها واحدة واحدة على مدى سنين .. عشان يوفر لكل عيل شقة يتجوز فيها .. و يبقى بيت للعيلة و مساعدة من الأهل للعيال اللي جم في زمن و بلد كلنا شايفين حالتها البائسة ..

أبويا كان موظف في وزارة المالية .. موظف شريف لا بيعرف يسرق ولا يرتشي ولا حتى يتغاضى عن أخطاء عشان يكسب علاقات قوية تفيده بعد المعاش ..

تدرج في المناصب .. مسك مناصب قيادية على مستويات مختلفة .. و كان مكروه من الموظفين المتكاسلين أو الفاسدين أو اللي لا مؤاخذة "حمير لا يصلحوا للشغلانة أصلاً" ...

وصل لدرجة وكيل وزارة .. و طلع معاش من كام سنة .. خرج من المنظومة القذرة دي و الحمد لله لا كسب مليم حرام ولا سكت عن خطأ او فساد ..

طول عمره بيفكر في مستقبل العيال و بيشتغل عشان يقدر يحققلهم حاجة تساعدهم في بلدنا الجميلة بلد الظلم و الفساد .. قرر يحط كل فلوسه تقريباً في شراء قطعة أرض صغيرة في مدينة الشروق و يبنيها و يشطبها ..

اشترى الأرض .. خط التراخيص و بدأ خطوات البناء ( و مش محتاج أحكيلكم عن بيروقراطية المصالح الحكومية في استخراج التراخيص و خلافه .. خلونا في التقيل اللي هاقوله في السطور الجايه ! ) ..

أول خطوة إننا عايزين نحدد أبعاد قطعة الأرض بالظبط عشان نبدأ نبني صح .. لأن المنطقة جديدة و فاضية فمافيش مباني قائمة تقدر تحدد على أساسها أبعاد القطعة بتاعتك ..

جه مجموعة تبع المقاولين العرب .. المفروض شغالين الشغلانة دي بالتنسيق مع جهاز مدينة الشروق .... بصوا على المكان .. و قالوا لأ مش هنحدد الأبعاد .. الموضوع صعب !

بلغنا الجهاز .. فبعتولنا واحد المفروض إنه بتاع مساحة (الله أعلم بقى مهندس ولا مساح ولا حلم و هو نايم إنه بيفهم في المساحة !)

المهم .. جه البيه .. عمل حركاته و قياساته و قالك الأبعاد هي كذا ..

لحد كده الحياة جميلة .. بدأنا نصب الخرسانات على أساس الأبعاد اللي البيه حددها .. لحد ما خلصنا سقف الدور الأرضي و عمدان الدور الأول كمان و الحمد لله ..

هل مصر بلدنا تسيبك تحمد ربنا و انت مرتاح؟ ... لأ طبعاً .. لازم يطلعلك الخازوق الوسخ المعتاد من دولتنا الجميلة ..

فجأة يطلع قرار إزالة .. ليه يا عم؟؟ .... قالك قطعة الأرض بتاعتكم مش متحدد أبعادها صح .. الأبعاد مايلة .. فأخدتوا جزء من الأرض اللي جنبكم !

يا عم و احنا مالنا .. ده الراجل بتاعكم اللي حدد الأبعاد دي !

ماليش فيه .. الغلط من عندكم !

يا جدع الغلط من عندنا ازاي ؟!

خلاص اكتبوا مذكرة و ربنا يسهل !

الكلام ده كان في مارس 2011

إحنا النهارده في يناير 2014 ... و لسه الوضع على الأرض زي ما هو .. صحيح أمر الإزالة حبر على ورق الحمد لله .. بس مش قادرين ندق مسمار في المبنى أو نعمل خطوة في عملية البناء .. و أسعار مواد البناء خلال الفترة دي تضاعفت .. حديد و اسمنت و طوب و خلافه ..

إيه اللي حصل خلال ال3 سنين ؟

نقدم مذكرة لجهاز مدينة الشروق .. فالجهاز يعمل لجنة .. فاللجنة تطلع قرار .. فالقرار يدخل لجنة تانية .. فاللجنة تبعت لرئيس المش عارف إيه .. فرئيس المش عارف إيه يقول نبعت بقى ناخد رأي هيئة المجتمعات العمرانية .. فالهيئة تعمل لجنة .. و اللجنة اجتماعاتها يوم الأربع بس .. و الأربع ده أجازة .. يبقى الأربع اللي بعده .. الأربع اللي بعده ييجي .. و ما تعجبهمش توصية الجهاز ... فيبعتوله تاني .. فيرد عليهم .... و هكذا ... !

طيب و احنا وضعنا إيه ؟
إحنا لازم نتابع كل ده ... لازم أبويا اللي على المعاش و بحكم السن مجهوده بقى أقل .. لازم يلف على الموظفين في الجهاز .. و في الهيئة .. و يطلع سلالم .. و ينزل في اسانسيرات .. و يتحايل على ده .. و يزن على ده .. و يزعق مع ده .. و يهدي الجو مع ده ... عشان بس ينجزوا في عرض الموضوع على لجنة ولا إصدار قرار في نقطة معينة !

و معاه في الرحلة صاحب الأرض التانية المتضرر من اللي حصل ... نفس الحواديت ... أرضه باظط و طار نصها تقريباً .. و حتى الآن لا قادر يبيعها ولا قادر يبنيها ولا اخد تعويض مادي أو أرض بديلة ..

المهم ..

وصلنا أخيراً و الحمد لله لقرار من الجهاز .. مبنى على كل المراسلات و المحادثات دي سواء جوه الجهاز نفسه أو مع هيئة المجتمعات العمرانية ..

القرار هو منح صاحب الأرض التانية المتضرر من اللي حصل أرض بديلة

و شراءنا الجزء اللي اخدناه بالغلط  بعد تسعيره ( لاحظ إنها مش غلطتنا أصلاً .. بس ده مال عام يا سيد ولازم تدفع!)

بعت جهاز المدينة القرار لهيئة المجتمعات العمرانية .. و هنا كانت الصدمة :

الهيئة رافضة القرار .. و بتقول ما ينفعش و احنا اللي غلطانين و مافيش حاجة اسمها أرض بديلة للمتضرر !!

جدير بالذكر إن الشخص اللي تسبب في المشكلة دي كلها بفشله و غباءه و عدم تقديره للمسؤولية ... مش أول مرة يعمل كده .. بشهادة زمايله.

أنا خلّصت القصة .. مش هاربط بينها و بين السياسة لأن خلاص ما بقاش في كلام جديد يتقال ..

بس ممكن اتكلم عن الشخص اللي نزل و حدد بنفسه أبعاد الأرض غلط و تسبب في كل المشكلة دي ..

و الأشخاص اللي بيمشّوا كل حاجة بالروتين الحكومي الوسخ و مش بيكتفوا بكده .. لكن بيضيفوا عليه غباءهم و تكاسلهم و ظلمهم الشخصي للبشر كمان !

عايز أقولهم و اقول لأي حد بيشتغل شغلانة بتأثر على حياة بني آدمين غيره :

ما تتوقعش إن حياتك تبقى جميلة .. و عايش عيشة كويسة .. وانت بتظلم الناس بشكل يومي و يتخرب حياتهم ..

بتستغرب أوي من الدنيا و تقول "هي ملطشة معايا كده ليه؟" ! ... ملطشة معاك عشان انت ظالم .. بتتسبب بشكل مباشر و غير مباشر في تخريب حياة غيرك .. و تضييع عمرهم بين مكتبك و مكتب زميلك و مكتب مديرك ..

ما تستغربش لما تروح مصلحة حكومية ولا مستشفى ولا أي مكان انت فيه "زبون" .. و هناك يستلموك زي ما بتستلم باقي البشر و انت قاعد على مكتبك !

شوف كام واحد بيدعي عليك .. و كام واحد حياته بتخرب بسببك .. و كام واحد بيصاب بأمراض الدنيا بسببك .. و كام واحد فلوسه بتضيع بسببك !

انت فاسد .. زي الفاسدين الكبار .. بس انت حمار .. لأن الفاسدين الكبار بيكسبوا من ورا فسادهم ... إنما انت كل اللي بيطولك هو الخسارة .. خسارة في الدنيا ..  وخسارة في الآخرة.

كل اللي طالبه من أي حد بيقرا هو نشر الحكاية .. و نشر كل حكاية بتحصل معاه و بتكشف الفساد و العفن اللي معشش في المصالح الحكومية ..

الفساد مش لازم يبقى فساد مالي و رشاوي و اختلاسات ... الفساد الإداري موجود .. و أخطر .. لأنه مالوش عقوبة !