أيوه كده !

أيوه كده !
خلّي ابتسامتِك نور عينيكي و رَسْمَها ..
ده الابتسامة مُبهجة .. ليا أنا
أنا اللي دُقت معاكي كل أنواع الألم
لكنه كان أجمل ألم !
أجمل ألم لأنه مربوط بالأمل .. لا ينفصل
و اما بيزول الألم .. يطغى الأمل في الحال
الصبر مفتاح الفرج ..
و انا عمري يوم ما قلت حاجه غير كده
لكنّي برضو بشر .. و ليا طاقة احتمال..
و الكبت مش دايماً مُتاح
و الدنيا حواليا براح !
فلابد من لحظة انفجار .. فضفضة 
ولا انتي شايفة غير كده؟؟

أيوه كده !
ابتسامة العينين تفرق كتير
تخَلّي عقلي قوام يطير ..
و الروح تروح ..
و تطيب جروح ..
و القلب ينبض بالحياة
و الطموح يوصل لغاية مُنتهاه
و العتمة نور
و الضيق بحور
و الصمت بوح

أيوه كده !
ده ابتسامتك هي الحياة .. هي الأمل
هي وقودي للعمل .. للانتصار
فيها شعوري بالوجود 
فيها باشوف طُهر البشر
و معاها باحس اني طاير .. مش بَشَر !
ماهو أصل انتي مش بشر..
فلابد إنّي أرتقي..
و أكون قُريّب م الوَسَط اللي انتي فيه
ما اعرفش ليه و ازاي بقيتي فيه ..
هو كده !
ولّا انتي شايفة غير كده؟؟

يا كل شاعر قال و عبّر عن مشاعره ..
و كلامه كله كان هيام ..
و تشبيهات .. و فنون كلام
احرقوا كل الورق !
امسحوا كل السطور !
قطّعوا كل القصايد و الخواطر و الحِكَم !
و اعلنوا الاعتزال !
و انسوا كل حروف و وصف ..
لكل قلب خطفكو خطف
كل اللي قلتوه كان مزيف .. مش حقيقة
وهم .. جايز
حلم .. ممكن
بس الحقيقة واحدة بس 
مالهاش شَبَه 
الحقيقة فيها هيّ ..
بيها هيّ
الحقيقة جوه بسمة العينين
نفس العينين اللي خلّوني فوق البَشَر ..
عينين حبيبتي
حبيبتي بس !
هي كده ..
 و مش قابل كلام غير كده !

لو يوم بقيت ماضي ..

أمانة عليكم ..

لو يوم بقيت ماضي ..

اسم و مالوش عنوان ..

لو يوم بقيت ذكرى .. 

صورة بدون ألوان ..

افتكروا إنّي حاولت ..

افتكروا إنّي ادّيت ..

افتكروا إني قلت في يوم "انا حَبِّيت"

و قولولها كنتي حياة ..

لما بعدتي .... مات !

بَنِي وَطَني ..

انا نِمت مرة ف يوم .. و شوفت حلم

شاب ف ربيع العُمْر..

أسمر..

جميل..

مبتسم..

و ف إيده شئ

لما سألته انت مين .. سِكِتْ

لما سألته عن اللي ماسكُه .. سِكِتْ

قربت أكتر ..

لابس قميص لونه أحمر

دققت فيه ..

طِلِع القميص مقطوع

و الاحمر ده لون الدم على صدره

لما اتفزعت .. رأيت ضحكته مالْيَة عينيه

سألته ليه

قال :

يا صديق ..

أصل كلكم زي بعض

شافني قبلك ناس كتير

حاولوا يقرّبوا

و كل ما أنطق بالحقيقة .. يهربوا !

أنا اللي كنت في السياسة جاهل جهول

و كنت أفهم بس في الأصول

كنت أفهم بس إن الكَدَّاب في النار ..

و الظالم في النار ..

و الغَنِي .. في النار!

كنت أفهم إن الأرض مش لينا ..

عشان احنا بس مش عايزين

كنت كاشف كل شئ

و ف يوم طِلِعت مع اللي طِلْعوا

ولا همِّني شومه ولا خرطوش

استغربت لما بصيت في الوشوش

كأني قُدَّام المِرايَه واقف ثبات

نفس العينين

نفس الإيدين

نفس الإرادة و الغضب ..

و نفس السبب


سألته عن اللي ماسكُه في تلك اليدّ ..

من غير ما ِيتكَلِّم سلِّمني ما في اليدّ

ورقة فيها أربع سطور :

الاسم : فلان ابن فلان

العنوان : خيمة في قلب الوطن

السن : من عمر الهرم

المهنة : ضمير البشر

بصيتله و انا تايه .. فهّمني يا ابن الناس!

قال ..

سمعت إن الناس عايزين يجيبوا الحق

و إنهم صامدين..لكنهم تعبوا!

و إن فيه انتخابات و فيها هي الأمل

عايز أكون موجود ..

صوتي أكيد يِفْرِق

رديت عليه ببرود :

مَعلِشّ يا ابن الناس..كان نفسي تشيل همّي ..

لكن في الانتخابات .. لازم "رقم قومي" !

يا أهل الاعتصام

يا أهل الاعتصام الكرام

يا شعاع الكرامة اللي اخترق النظام

يا اللي بيكم كلنا عرفنا نثور

مني ليكم كلكم أعظم سلام

يا اللي متّوا و يا اللي عيشتوا و يا اللي صممتوا و بقيتوا

انتو اللي قولتوا لأ و كل واحد كان في بيته

انتو اللي نمتوا على حرف الرصيف

لاجل غيركم يلقي يوم حق الرغيف

انتو اللي كان البرد يختشي يقرب حداكم

كان يختشي منكم.. مش من لحاف او بطانية

مجنون و جاهل اللي فكر يتحداكم

لو كان فاهمكم عمره ما أعلن تحدي

عمره ما حاول يقاوم

عمره ما جرب تعاطف

لو كان فاهمكم كان نزل مدد معاكم

برضو على حرف الرصيف ..

او جوه خيمة الحزب الشريف ..

حزب أهل الاعتصام

اللي قاوم حتى تكسير العظام

اللي لم يهتز من غدر السخيف

ولا من كلام المفترس ويّا الأليف

اللي ناضل و اللي قاوم و اللي عاش ..

عشان حق اللي مات ما يروح بلاش

اللي أدّب الرتب ويّا العساكر

بعد الصلاة .. لو نسيت أنا لسه فاكر

اللي ما فرقش معاه ضرب الرصاص ..

ولا كلب شرطة بكل خسة عالخلق داس

اللي هز عروش الظلم بس بهتاف

عمره ما هيكست في يوم و يرجع يخاف

فاعتصم !

اعتصم .. و اهتف .. و قول

لسه فيه 100 ألف غول

لسه مشوارنا طويل

محتاجين 100 ألف ليل

الاعتصام أقوى الحلول

الاعتصام للحُر بس

خلّي اللي يقول يقول

ده انت رمز الاحتمال

انت فارس م الخيال

التراجع شئ محال

علّي صوتك بالنضال

و استعد يا صديقي للسعادة

استعد للمجد الجميل

و بإذن رب الكون الجليل ..

عن قريب هيعلي صوت الاحتفال

إهداء لأحرار مصر المعتصمين في ميادين مصر

المحروق

مريت بنشوة فوق الكوبري الطويل

و قلبي بيدق مستني لحظة ظهور

وقعت عينيا على الفندق هناك بعيد

و الكوبري تحته هوا غطّى مياه النيل

جهزت نفسي , فنجلت عيني, و ابتسمت

و ظهر البناء الشامخ اللي كان

و قصاده يافطه فيها وجه جميل

طفلة بريئة و معاها زمايلها الجمال

مكتوب عليها: "عشان مستقبل ولادك .. كون ذليل"

أنا شوفتها كده .. من غير ما تسأل ليه

من غير مبالغة ولا ضحك ولا تهليل

اليافطه كانت في العلالي مزهزهه

ألوان بهيجة ينخدع بيها الذليل

طاطي و إحني جبهتك و قول آمين

انسى و إكتم فكرتك و اسكت و ميل

ميل على جنبك و قول: مافيش فايدة ! أصرخ و أهلل ليه؟ .. ما الشعب كله بخيل !

يعني خلاصة القول .. كانت يافطه حرام

لكنها مبهجة, خدّاعة بالتمثيل

حتى الطفلة البريئة بقت موديل للزيف

اضحك يا عم و صدق نفسك .. ما الشعب أصله عويل

لكن دي كانت يافطه و زمنها خلاص انتهى ..

لأ .. زمنها ابتدي, من غير كلمة ذليل

دققت في المبني و كمان في عيون البنت

عيونها بتبتسم, و المبنى كان محروق

صحيح واقف محله و لسه لم ينهار ..

لكنه كان محروق..

أصبح مكان موبوء

حزب الفساد و القبح و الجبروت

لو دخله مرة شريف يخرج قوام مخنوق

حيطانه سودا ما تعرف ده جاي منين ..

سببه القلوب السودا ولا عشان محروق؟

الحرق بس ماكانش ولعه و مسكت فيه

دي قلوب ملايين البشر و كان كاتمها الخوف

و ف لحظه عليت فوق ..

كسرت سلاسل خوفها .. و مسكت شعاع النور

صرخت بعلو الصوت : اسمعنا يا مخلوق !

ارحل معاك شلتك و كفايه كده

كفايه !

محروق حزبك و نجلك !

محروق أهل الفساد !

محروق عسكر جلالتك اللي ولع في البلاد !

محروق دراع يمين .. محروق دراع شمال !

محروق صاحب فلوس ركب من غير معاد !

كان الحريق عالهوا متذاع

و العين تدقق و تسأل سؤال واضح ..

فين النظام الشامخ أبو ألف ألف دراع ؟

و كان فين مدفونين الناس؟

و فين اللي خدودهم كانت لرجله مداس؟

دلوقتي في الزنازين .. دلوقتي في الفتارين

سيرة على كل لسان .. مشاع

إسود هباب لون البناء الفذ

إسود هباب لون الوشوش إياها

العرش تحته مش بس مال و اتهز ..

ده اتكسّرت رجليه و اتساوى بسطح الأرض

أصبح رماد, عجز من تاني يفز

ما هو أصله هيقوم إزاي بعد الخداع ما انكشف؟

يشحت عواطف بشر ولا هيشحت مال؟

ولا هيحشد من تاني اللي جنبه وقف

خلاص زمانك رحل .. آن الاوان لشروق

و لا عمر مصري هيرضي برجوع نظام محروق!

الـرمـز

عار عليك يا مصري يا اخويا

لما يقوم الناس بالثورة و انت تقول ده مبارك أبويا !

و تقول لأ بلاش إسقاطه

و بتنسى اللي عيالهم ماتوا

و تقول رمز !

و تقول اللي خربها عز

و تقول الريس كان شاطر و المشكلة شلة فاسدين

ده على أساس إنه كان فين؟

في الحمام ؟؟

و أما خلعه الشعب الحر قلت كفايه عليه الخلع

ده هيفضل رمزنا بالطبع

قالوا محاكمة ..

قلت كفايه قلة أصل

إحنا بلدنا كبيرة يا ناس .. إحنا مصر

حاكم و اسجن و رجع مالك ..

بس إلا الرمز

و كفايه يا ناس همز و لمز

يادي الخيبه عليك و عليه

المخلوع التيت بقى رمز؟؟

ده رئيس سابق جابلنا عار ..

لما ماتوا اخواتنا في غزة ..

و اما عراقنا صابه دمار

و ف أفريقيا الخيبة تقيلة

و اوعى تقوللي ده كان طيار!

طيار إيه؟ هو احنا طالعين نتفسح؟؟

رمز إزاي؟ و ف عهده دمنا أنهار

إزاي رمزي و رمزك يبقى حرامي كبير؟

حاكم بلده بالتزوير

بايع أرضه لكل حقير

قالك رمز !

إزاي بس تقول على بلدك رمزها سفاح ؟

ليه ؟ عشان ايه؟؟

أنا أفهم إن يهودي صهيوني ممكن رمزه يكون سفاح

أفهم إن عصابة خسيسة يكون رمزها سفاح

إنما مصر ..

مصر مسلة و هرم

عالم و طبيب

جندي يموت على جبهة سينا ف إيده العلم

و شباب أعزل في التحرير اتقتل

أمه بتبكي وكلها ألم

رمزنا هو مصري شريف رافع راسنا بين الأمم

مش بنشوفه نحس بندم ..

نحس بعار

يا ابني الرمز ده حاجه كبيرة

حاجه عظيمة .. حاجه تشرف

مش حاجه ارتبطت بدمار

قالك رمز !

ياخي ملعون أبو دي عقلية

اللي تخلي رمز بلدنا واحد من شلة حرامية

ياخي ملعون أبو دي عقلية

اللي تسب و تلعن فيا .. علشان إيه؟؟

علشان قلت حاكموا بسرعة رئيس مخلوع

خلي الشعب فقير موجوع

خلى اطفالنا تموت م الجوع

خلى شبابنا تهج و تطفش من غير ما تتمني رجوع

و ياريته قال بس ده رمز

لأ ده الأدهى قالك أبويا

مش عايز أقّبّح في كلامي .. بس بجد دي حاجه تشل

ياخي ملعون أبو دي عبودية

آه عبودية

لما تدافع عن جلاد ..

عصره الذهبي كان كله فساد

طيب يا ابني إديني أمره

عمل لك إيه؟

اتصورت معاه ف طياره؟

أو يمكن إدّاكو عماره

أو ممكن حتة شوكلاته

معلش اعذرني .. حاول تفهمني .. إديني مبرر معقول

هل مثلاً بجلالة قدره زودلكو حصة الفول؟

رجعلكوا أخوكو المقتول؟

لأ بالعكس .. دي كانت نكتة

كان المصري يموت م الجوع و هو يطنش

كان المصري يموت غرقان و هو ينكت

كان المصري يموت تعذيب و هو ساكت بشكل مريب

عارف ليه؟

علشان كان سفّاح متمرس

همه كله يكون الريس

أو للكتكوت ابن سعادته الكرسي بتاعه يتورّث

قالك أبويا ! .. قالك رمز !

أرضــي

أرضي بقت خرابة
عششت فيها الخيابة
عايشين إحنا ف بلدنا
ولا عايشين في غابة !

أرضي بقت مباحة
بيخرّبوها ببجاحه
مافيش دكر يحميها
م الخسة و الوقاحة !

أرضي بقت عريانة
و من زمان جعانة
بتشوف في كل حتة ..
قلة أدب و إهانة !

أرضي بقت يتيمة
و مالهاش أي قيمة
كداب اللي يقول
هي دي القيادة الحكيمة !

أرضي ف كل يوم بتموت
و هو قاعد منجعص .. مبسوط
يخرج علينا بكلمتين ماسخين
و احنا حيارى ما بين عياط و سكوت !

أرضي في كل يوم تنداس
بتنادي بكل ذل: إلحقوني يا ناس
قوموا احرسوني و احفظوا عرضي
أرضى بقت وحيدة .. خلت من الحراس

أرضي قالت: عايزه شعبي جسور
يدعي على الظالم .. يهجم عليه و يثور
و يفوق من نومة طالت سنين و سنين
كان فيها شعب ذليل .. جبان .. مكسور !

أرضي بتبكي كل يوم بالدم
بتقوله بمرارة : كفاية.. اتلم
بتبكي بحرارة و دمعتها على خدها
خايف لا ييجي يوم و تموت بكتر الهم !


معتز
1-1-11

أبيض و اسود

إسود أبيض .. أبيض إسود
منهم غارت الألوان
أبيض .. لون البدله الميري
و اسود .. برضو ده لونها كمان
حتى الجزمه الميري .. سواد
عمرك شوفتها بالألوان؟
و السبورة .. غطّاها سواد ..
إن مرة حاولت تغيّر لونها..
بالطباشير تملاها بياض!
بالطباشير .. تكتب عنوان
تكتب كلمة عن الأوطان
و تكتب (أخضر) بطباشير أبيض..
شوفت إزاي!
حتى شعر البني آدمين
إسود حبّة .. و ابيض حبّة
بني آدمين من طين الأرض .. مش خواجات
بني آدمين جنبي و جنبيك .. مش عفاريت
بني آدمين بتحس و تشعر .. مش توابيت!

و ما أحلى العسل!
كله مفيد
كله حديد
يا ابيض يا اسود بالتأكيد!
حتى يا ناس الباذنجان!
طعمه جنان!
اسود و ابيض هو كمان!

نادي عظيم و تاريخه مديد
زمالك حديد
الأبيض لونه ..
زيه زي ريال مدريد!

و الورقة اللي انا باكتب فيها .. أبيض فاتح
و البالطو بتاع الدكتور .. أبيض فاقع
و بنمشي في شوارع سودا
إسود .. لون الكوكا بصودا
إٍسود .. لون شباك الأوضه
ما هو لون الأوضه الضلمه .. سواد

و ليلتك .. سودا !
لو مرة وقعت في إيد بني آدم إسود قلبه
ليلتك سودا !
لو فكرت ف مرة بجرأة تقول الحق
ليلتك سودا !
لو جربت تغيّر مرة .. و تقول لأ !
ليلتك سودا .. أسود من قرن الخروب
لو عايز تعدل من تاني نظام مقلوب

بص لفوق .. هتلاقي سحابة
لونها اتغير .. كانت بيضا و وبقت سودا

تصرخ صرخة ف عز نهارك:
يا نهار إسود .. يا نهار أبيض
و ف وسط الحفلة عريس و عروسة..
و أكيد برضو همّا لونين .. إسود و أبيض

حتى النمل! .. إسود و أبيض
و الأغنية تقول و تعيد .. في بياض و سمار
حتى الحرب في أرض بعيد .. بين لتنين

و الست بتقرا الفنجان ذو اللون الأبيض
و القهوة جوه الفنجان بتأكد: مصيرك إسود!

و البيت الأبيض بجلالته .. سكنه الإسود
و دروجبا و إتّو و شيكابالا .. لونهم إسود

و نهار إسود يومياً في الأرض الغالية..
طفل يتيم..
أم بتبكي .. و لابسه الإسود..
مستنية حمامة تطير باللون الابيض..
مستنية اصحاب الكلمة .. يشدّوا الهمّة
و يبطلوا لبسهم العمة
و يشيلوا النضارة السودا
و يطلًوا على ناس غلبانه..
عينها عمتها الميه البيضا
و بطنها شبعت .. م الأكلة السودا !



ديسمبر2010

باكتب عشاني

ساعات أحتاج أعبر عن حاجه جوه منّي
جربت فيها أسرح ..
جربت كمان أغني
جربت اقعد لوحدي ..
أفكر
جربت اقعد معايا ..
أشكي همي .. 

أحكي لنفسي عني

جربت مرة .. اقرا حتة من كتاب
دورت في الجرايد
قريت كتب شباب
و كمان جربت اقرا لفطاحل الكتاب

سألت نفسي مرة : هو انتي عايزه ايه؟
بتدوري على إيه؟
تايهة و سارحه ليه؟
قالتلي:عايزه ألاقي حد  يكون جايب في سيرتي
حد عارف عن حقيقتي
حد يكون حاسس بحيرتي

نفسي لو ألاقى مرة ..
حد كاتب عن مبادئي
حد حبه زي حبي
حد مش عايز يخبي
حد عنده كلمة حلوة .. تمس حتة منّي

قلتلها: كل واحد بيكتب عن كيانه
مرة يكتب عن حبيبته ..
و مرة يكتب عن جنانه!
و ساعات كتير ألاقي حد كاتب عن بلدنا
كل شارع .. كل حارة ..
كل عطفة وكل مدنة   
يكتب عن الصراحة
يكتب عن الوقاحة
يكتب عن المهادنة!


كلام مليان نباهة و وعظ و حكم
و كلام عن كورة .. و شوية لاعيبة .. و حكم!
و كلام عن أغاني خلت من المعاني
و كلام عن النقاب و صحوة الحجاب
و كلام عن كلام البنات ويا الشباب


يا نفسي صدعتيني و بهمك بليتيني!
عايزه كلام متفصل ..
كتبه كاتب مأصّل
كلام لايق عليكي ..
و يلمّس مع مشاعرك
اقولك على حاجه حلوة؟
اعملي ماحدش سامعك
ارتاحي ..
ماحدش حاسك!
 القلم بين ايديكي
و الورق كتير حواليكي
يا تطلعي اللي عندك و تفتحي الأبواب
يا هاخنقك بإيدي و ارميكي في الدولاب!

لأ لأ .. أنا خايف

يا اللهول .. يادي الخيبة

ناس بتعبّي فلوس في زكيبة

و ناس شايفاهم و بتتعجب

و تقول : خلوا بلدنا زريبة!

طالع وكال نازل واكل

و التاني شاف حقه بيتاكل

لكن حط لسانه في بؤه

و قالها ف سره : بلاها مشاكل

حاول يعمل قال مش شايف

كبّر .. نفّض .. و فضل واقف

نفسه قالت له : يلا اتحرك !

رد وقال : لأ   لأ .. أنا خايف

عيدنا و زيدنا يا مصر كتير

و الكل قال عايزين تغيير

لكن كله كلام في كلام

امتى الكلمة لفعل تصير؟

رغيف العيش  رغيف العيش

مش لاقيينه .. إلحق يا شاويش

رد علينا و قال : و أنا مالي

غيّروا ناس ع الفينو تعيش !