كيف تتقن صلاة الجمعة على المنهج المصري في 5 خطوات ؟

لأن الشعب المصري متدين بطبعه .. فالكل لازم يسعى إنه يطبق الدين بالشكل المصري الجميل.

فيما يلي5 خطوات عشان تتقن صلاة الجمعة على المنهج المصري السليم ...

1. تخطَّى كل الصعاب!

لو وصلت متأخر مافيش مشكلة .. ادخل و العب لعبة "قفز الحواجز مسافات قصيرة"  لحد ما توصل للصفوف الأمامية عشان تاخد الثواب .. و بالنسبة للي لطشتهم بالقفا برجلك ممكن اللي لطشته على قفاه تقوله لا مؤاخذة وتكمل طريقك عادي

2. اخلق مساحتك الخاصة!

 لو وصلت متأخر والصفوف الأمامية اتزحمت .. ما تُحبطش .. اوعى تسيب الثواب يروح منك .. هتلاقي 10 سنتيمتر مربع بين شخصين .. حاول تقف فيهم .. و اخبط على كتف الشخصين وشاورلهم إشارة معناها إنهم يوسعولك شوية .. ممكن يبصولك شذراً .. عادي .. تنَّح .. هيوسعولك في الآخر .. ما تقعدش بقى على طول .. صلي ركعتين .. و انت بتصلي هتفضل تخبط فيهم فهيضطروا يوسعلوك أكتر .. مبروك لقيت لنفسك مكان في الصفوف الأولى .. عاش!

3. آآآآآآآآآآآآميييييييييييين!
 الصلاة بدأت .. ركز أوي أثناء قراءة سورة الفاتحة .. أول ما الإمام يقول: "ولا الضالين" جهز حنجرتك و قول: "آمين" بأعلى صوت عندك و أطول مد في الحروف تقدر عليه ... كده كل الناس هيقولوا عليك راجل تقي و وَرِع .. مبروك!

4. الله أكبر!
 كل تكبيرة بيقولها الإمام رددها وراه بصوت عالي .. سيبك من اللي بيقولوا إن الصلاة جهرية للإمام فقط مش ليك .. لازم تثبت نفسك إنك أتقى واحد في قلب المكان!

5. الهاتف المحمول!
 سيبك من موضوع إنك تعمل الموبايل صامت .. اشمعنى انت يعني؟!
احتمال الإمام يقول للناس قبل الصلاة اقفلوا الموبايل أواعملوه صامت .. سيبك منه هو ماله هو؟!
ممكن بس لو رن أثناء الصلاة تقفل الصوت .. بس مش شرط يعني عادي براحتك .. خصوصاً لو الرنة دعاء أو أغنية محمد فؤاد بتاعت مسلسل الشعرواي .. كده انت في السليم.


لو أتقنت ال5 خطوات دي أقدر أقولك مبروك .. انت كده أتقنت صلاة الجمعة على المنهج المصري السليم .. بارك الله فيك أخي الكريم.

أسباب تدفعك إلى كراهية المسلسلات العربي

- عندما تكون " التيمه " الأساسية لكل المسلسلات تقريباً هي : ( رجل أعمال أقرع أصلع شرير يدوس على الجميع و يأتي بكل الأفعال التي من شأنها توسعة إمبراطوريته على حساب البطل الفقير الذي يناضل .. و يناضل .. و يناضل .. ثم يناضل .. ثم تأتي النهاية السعيدة بزواج البطل من ابنة رجل الأعمال بعد نزول غضب الله على رجل الأعمال و إصابته بالشلل أو دخوله السجن .. ثم تكتمل النهاية السعيدة بجلوس البطل على كرسي رئيس مجلس إدارة مجموعة شركات رجل الأعمال!)   .... ... طبيعي أن تكره المسلسلات العربي!

عندما يكون عدد حلقات المسلسل يتجاوز الثلاثين بينما الاحداث لا تستحق أكثر من 5 حلقات  ... طبيعي أن تكره المسلسلات العربي!

عندما تشاهد الحلقة الحلقة الأولى و بعدها الحلقة السادسة دون ان تجد أنك قد فوّت أي أحداث ... طبيعي أن تكره المسلسلات العربي!

عندما تتأزم كل الأحداث و يبكي الجميع و تسوّد الدنيا في الحلقة قبل الأخيرة .. ثم تتوزع الابتسامات و القفشات السمجة على وجوه و ألسنة الأبطال في الحلقة الأخيرة من فرط السعادة بزواج البطل من البطلة و إصابة أبيها المفترس الشرير بالشلل !  ... طبيعي أن تكره المسلسلات العربي!


عندما تجد ممثل أو ممثلة مضى عليهم 50 سنة في الوسط الفني و مازلوا يقدمون أدوار الشاب الوسيم (كل البنات بتحبك .. كل البنات حلوين) و الفتاة الفاتنة(أرجوك إوعى  تغير .. أنا حواليا كتير) !!   ... طبيعي أن تكره المسلسلات العربي!


عندما يحدث لك اضطراب عقلي و أنت تتابع  أحد المسلسلات و تسأل من حولك : 

( مش ده اللي دخل السجن امبارح؟ .. هو خرج امتى و ازاي؟) فيرد من حولك : 

( لا يا مسطول .. امبارح ده كان في مسلسل تاني .. بس نفس الممثل) !   

... طبيعي أن تكره المسلسلات العربي!


عندما تصاب بالاضطراب مرة أخرى فتسأل ( يا جماعة مش دي كانت شغالة رقاصة ؟؟ ... هي اتحجبت امتى و بقت جده كمان؟؟) فيأتيك نفس الرد ( ده مسلسل تاني .. يا مسطول برضو!! )   ... طبيعي أن تكره المسلسلات العربي!


عندما يكون المسلسل 30 حلقة و كل حلقة مدتها ساعة إلا ربع و يكون البطل متواجداً في كل الحلقات و لمدة لا تقل عن نصف ساعة من الحلقة   ... طبيعي أن تكره المسلسلات العربي!


عندما يأتي أحد صناع المسلسلات بفكرة جديدة مثل السيت كوم أو السيرة الذاتية .. فتصبح سبوبة و موضة تنفجر بلا هوادة و تنتشر في جميع القنوات فتكون مجبرا على متابعتها !   ... طبيعي أن تكره المسلسلات العربي!


عندما يكون احد مشاهد السيت كوم  يحتوي على "نظرة من فوق لتحت" من البطل للبطلة فيأتيك صوت الضحكات المسجلة عالياَ خفّاقاً معلناً عن مولد نجم جديد في عالم الكوميديا (ذلك الذي ينظر من فوق لتحت)!!   ... طبيعي أن تكره المسلسلات العربي!


عندما تجد تلك الممثلة اللبنانية تتحدث في مسلسل تاريخي بلغة عربية ركيكة و في اليوم التالي تستضيفها اندية الروتاري و الليونز لتتحدث عن النجمة الجديدة في عالم المسلسلات التاريخية   ... طبيعي أن تكره المسلسلات العربي!


عندما تجد شعار إحدى قنوات المسلسلات كالتالي: " قناة(.....)  ..رمضان وقتها "  ... طبيعي أن تكره المسلسلات العربي!


عندما تجد من حولك يتوقعون أحداث المسلسل بدقة متناهية و تجدهم رغم مصممين على متابعة كل كبيرة و صغيرة و السؤال عمّا فاتهم 

... طبيعي أن تكره المسلسلات العربي!

مـيي آي هاف' يور أتينشن بليز ؟!

هاو آر يو إيفري وان؟

توداي آي وونت تو توك أباوت أ فيري إمبورتانت توبيك ..
واي دو وي يوز فرانكو آراب؟
واي وي رايت أرابيك ويذ إنجليش ليترز؟
آي هاف آسكيد أ جيرل أون فيسبوك أباوت ذيس ... شي أنسارد : " بيكوز إت إز ذا لانجويج أوف إنترنت ! "

وات إذ ذيث؟!

آي سبيك أرابيك , آند يو تو ... صو .. واي وي يوز أناذر ستيوبيد لانجويج إن آور رايتينجز؟!

آي نو ذات صم بيبول يوز فرانكو آراب بيكوز ذير كيبورد هاف نو آرابيك ليترز .. بط إيف يو هاف'  نو إمبروتانت ريزون تو دو ذيث ... وااي دو يو دو إت؟

هاف يو إيفر سيين آن أميريكان رايتينج إنجليش ويذ آرابيك ليترز؟!

ستوب إت
بليز

و كفاية كده عشان انا اتشليت !

يا ترى انت النسخة رقم كام؟
كان فيه كام واحد و واحدة قبلك عملوا زيك من غير تفكير؟
مشيوا ورا موضة لبس او موضة شعر او حتى قلدوا ممثل او مطربة من غير تفكير؟
تعرف ان صحابك اللي معاك كل يوم عاملينك التريقة بتاعتهم من وراك؟
و يا عيني عليك يا حبيبي.... فاكر انك لما تتكلم زي النيجرز بتوع الراب في أمريكا تبقى انت كده الشاب الكوول اللي ماحصلش!
فاكر انك لما تتكلم كلمتين انجليزي " قصدي شتيمتين انجليزي" و تحرك ايدك زي بتوع الراب يبقى انت كده وصلت للعالمية؟!
ياخي ..... !!!
اسمحلي اقوللك ان حضرتك "قفا" !! ايوه... لأن صحابك يا معلم بيبصولك بصات مش ظريفة خااالص!
عارف بيقولوا عليك ايه؟
بيسألوا بعض.... " هو الواد توتو لسه عايش في جو الراب بتاعه ده؟"
" ايوه يا عم... ده انا كنت فاكر انهم شوية ألش و هايعدوا..لكن الحكاية قلبت بجد و شكله هايقلب نيجر امريكاني!! ههههه "
"الواد ده مسخرة و الله العظيم... ربنا يشفيه"

ده كان كلام صحابك!

تخيل بقى غير صحابك بقى بيقولوا ايه؟
اكيد متخيل كلامهم شكله ايه!
انا مش هاقول لأن كلامهم فيه ألفاظ تخدش الحياء العام!!

----

بلاش بلاش يا عم الراب و الكلام ده
طيب و الايمو؟!
قبل ماتقول حرية شخصية و الكلام الفاضي ده........ انا باقوللك اه طبعا حرية شخصية....
بس انا مش فاهم......ازاي قابل على نفسك كمية التريقة دي؟
ازاي يعني مافكرتش للحظه ان كل الناس دي ممكن تكون صح و انت اللي غلط؟
مش هاتكلم عن الشعر و الحاجات دي
انا هاتكلم في حتة تشويه جسمك و التقطيع فيه!
ايه الهبل ده يا عم؟!
واحد مسطول في امريكا او غيرها كان قاعد فاضي او ضرب ماريجوانا و فجأة طلبت معاه يعور نفسه.... و يسمي نفسه إيمو.....ز تقوم حضرتك بكل بساطة تقلده من غير تفكير؟!
هي مالهاش غير سببين..... اما انك دماغك فاضية و ماسمعتش عن حاجه اسمها تفكير "غبي يعني" و اما ان فيه حد ماسك عليك ذلة و بيهددك انك لازم تعمل كده!!

بلاش طيب نحدد و نقول ايمو و راب و لبس و الكلام ده
انا مش هاقول غير انك لو بتقلد تبقى دلدووول...ايوه دلدووول... يقولولك شمال تروح شمال..يقولولك يمين تروح يمين ... او ممكن زي الحمار او الحصان او اي حاجه مركووبة.... بتتوجه زي ما اللي سايقها عايز...من غير تفكير و لاتمييز

حضرتك من احقر المخلوقات على وجه الأرض...لأنك بتمشي ورا ناس ممكن يبقوا اقل منك في العلم او الذكاء لكنك فرحان بيهم و بتقلدهم من غير اي تفكير... ما اعرفش انت بتعمل كده ليه....لكن الاكيد انك مش عايز تبقى مرج نسخة...مجرد حمار جديد مركوب و بينفذ و بس!!

عبـد الـواطـي!!

طبعا مش بعيد ناس كتير تقرا العنوان تتضايق و تقول حرام و تعلن الحرب و تبتدي تنشر في كل حته ان فيه واحد بيغلط في الدين و "حسبنا الله و نعم الوكيل ! مش كفاية أعدائنا في اوروبا و امريكا! " و ممكن جدا تنتشر اشاعة على المنتديات عنوانها " الشباب المصري على طريق الشيطان" !!
و بعد كل ده يطلع العبد الله قصده مش كده خالص !
أنا هنا هاتكلم عن شخصيتين موجودين بيننا ... الواطي و عبد الواطي!
الواطي هو بني آدم مريض أو نيته زي الزفت .. فجأة -أو حتى بعد تخطيط - بيخترع حدوته .. اشاعة .. خبر .. و يبتدي يقولها للناس اللي حواليه و لو عنده امكانية ممكن يدخل على اي منتدى و يرزع العنوان التمام و يحكي الحكاية ..
طبعا الباشا ده واطي لأنه نيته زي الزفت زي ما قلت ... ممكن بقى يبقى ليه مصلحة في نشر الإشاعة .. ممكن يكون بيتسلي و عايز يضحك على الناس .. عايز يضحك على عبد الواطي !
عبد الواطي هو واحد أخد كلام الواطي زي ما هو .. من غير ما يتأكد .. من غير أي دليل .. و بحسن نية - أو حتى سوء نية - نشر الاشاعة هو كمان و بقى عبد للواطي .. بيروح مكان ما الواطي عايز .. مالوش رأي .. مالوش عقل .. مافيش مخ بيفكر بيه .. مجرد بغباان .. بيردد الكلام و هو حتى يمكن مش فاهم هو بيقول ايه!

إذا كنت انت الواطي .. ماتفتكرش اننا هانسيبك ! دورك جاي و مش هاتجيلك الفرصة دي تاني !
أما بقى لو انت عبد الواطي .. ازاي راضي تبقى عبد لبني ادم زيك .. و غالبا هو أقل منك في حاجات كتير ؟! .. ازاي راضي تبقى مجرد بغبغان .. بينقل الكلام .. مجرد وسيط .. الإشاعة تعدي عليه و تروح لغيره؟! .. و ممكن جدا الإشاعة دي تتسبب في مصيبة ليك انت شخصيا ! ... ليه راضي تبقى مجرد صدى صوت .. بيردد كلام الواطي ؟!

الهيروغليفية الحديثة !!

لا أدري ماذا أسميهم....أو بماذا أصف حالتهم تلك...هل هي عقدة نقص و محاولة لإثبات التفوق بإجادة لغة أجنبية؟ أم هو مجرد تقليد أعمى؟؟ أم أن هناك سبب منطقي و مقنع لما يفعلون؟؟

أتحدث عن ذلك الرجل الذي يطلق على المتجر الذي يمتكله اسما اجنبيا -غالبا إنجليزيا- و فوق ذلك ربما يكون غير مصحوب بأي اسم عربي ! هل هو نوع من جذب السياح و الاجانب؟.....لا أعتقد أن كل بقعة من أرض مصر تعتبر مقصد للسياح إلى الدرجة التي تسمي أكشاك السجائر بأسماء أجنبية! و لا أتخيل أن يقوم اجنبي بحلاقة شعره في صالون حلاقة لمجرد أن اسمه "super star لحلاقة"!!
أنا لا أذكر ذلك لتضحك أو تتعجب..
تأمل في حياتك..فربما تجد أن والدك أو خالك أو عمك أو شقيقك أو صديقك تنطبق عليه تلك الأوصاف....
أدعوك إلى سؤله عن سبب ذلك و أتوقع أنك لن تجد أي إجابة منطقية!

أتحدث أيضا عن 90% من مستخدمي الإنترنت في مصر خاصة الشبابا منهم..و تلك "الإفتكاسة" المسماه بالفرانكوآراب أو كما أسميها .. "الهيروغليفية الحديثة"!
تلك اللغة لمن لا يعلم هي استخدام الحروف الإنجليزية في كتابة اللغة العربية بل و أضيف على ذلك استخدام بعض الأرقام الإنجليزية أيضا في كتابة حروف عربية معينة مثل استخدام رقم 3 في الإنجيزية لكتابة حرف العين!
عندما سألتهم عن سبب استخدام هذه اللغة كان الرد ينحصر في الآتي...
أحدهم قال"هذه لغة الإنترنت"......فقط؟؟ هل هذا هو السبب ؟! لا أفهم..هل معنى ذلك أنه لا يمكن استخدام لغات اخرى؟؟ هل يستخدم الاجانب هذه اللغة؟؟
رد آخر كان "لأنها أسهل في الكتابة"......كيف ذلك؟؟ كيف تكون أسهل من اللغة التي تقرأها يوميا في الكتب الدراسة أو الأورق و الوثائق في العمل أو في الصحف و المجلات ؟؟ كيف تكون أسهل من لغة امامك ..تتحدث بها..؟
هذا الذي يقول أسهل يتكلم عن سبب استخدامه لتلك اللغة الآن لكن سؤالي هو..لماذا استخدمتها في الأصل؟ ربما تقصد أنها أسهل لأنك تعودن عليها لكن لماذا أقبلت عليها من البداية؟؟

أعتقد أن الحكاية تتلخص في التقليد الأعمى و اتباع من يريدك ان تتبعه دون ان تشعر..لن أقول انها نظرية المؤامرة و أعداء الوطن والمتربصين بنا....سأقول انه مختل عقليا..فارغ الذهن..اخترع هذه اللغة فقلده الآخرون دون أي تفكير...مثل ذلك أيضا ظهور أغنية معينة و انتشارها بسرعة رهيبة ثم اختفائها بعد بضعة أسابيع ..مجرد موضة يتبعها الناس في سلسلة من التقليد الاعمي ...

ما يزيد الامر "خيبة" هو عدم إجادة هؤلاء "المساكين" لتلك اللغات...فلا يجيدون اللغة الإنجليزية و تمتلئ كتاباتهم بالأخطاء اللغوية الفاضحة...و أيضا لا يجيدون الهيروغليفية الحديثة و يكفي أن أقول أنه يمكن أن يكتب أحدهم إسلام هكذا ((aslam لمجرد أن هناك همزة في بداية الكلمة و طبعا الفارق واضح بين إسلام و أسلام...و قس على ذلك الكثير من الأخطاء المستفزة!

و في الوقت الذي نبتدع فيه لغات جديدة أراها معقدة ولا فائدة منها إطلاقا...أجد أم كبرى الشركات العالمية تهتم بوجود اللغة العربية في منتجاتها..في اجهزة التليفون و التليفزيون و غيرها من المنتجات! بل أيضا تقوم مواقع الإنترنت الكبرى مثل مايكروسوفت و جوجل و فيس بوك بتوفيير اللغة العربية كلغة أساسية للموقع لتوفير أحسن خدمة للمستهلك العربي!
و على ذكر الهاتف المحمول ..كثير من المصريين أيضا تكون اللغة الأساسية على المحمول الخاص به هي الإنجليزيةو عند سؤالي عن السبب كان الرد "لأن الانجليزي شكله احلى" !!!لا تعليق.

ما دفعني للكتابة في هذا الموضوع عدة أسباب اهمها..
كرهي التام لمسألة التقليد الأعمي و القيام بأي فعل او تبني أي فكرة بلا سبب
و أيضا أن احد أهم مقومات تقدم الأمم هو نشرها لثقافتها الخاصة بما يعود بالنفع على كل المجالات..و يكفي ان أعطى مثال بهوجة المسلسلات التليفزيونية التركية و مدى إقبال العرب على معرفة المزيد عن هذه الدولة..بل و قيام الكثير منهم بزيارتها في زيارات سياحية بل و امتلاك منازل هناك! و الدعاية الكبيرة للفن التركي بدعوة النانين الاتراك لمهرجاناتنا السينمائية العربية!
دورنا الآن أيها الشباب العربي ...أن ننشر تلك الثقافة و تلك اللغة بين الناس. في العالم اجمع..و هذا موضوع كبير لن نتطرق له قبل أن ننشر ثقافتنا بيننا أولا !