مساء الحرية و الديموقراطية على مصر الغالية :)
هحاول ما اطولش عليكم و يكون هدفي مش إنني آكل دماغكم بكلام كبير و خطير .. كفايه اللي عملوه فينا في الكام يوم اللي فاتوا
بس عايزكم .. من فضلكم .. يبقى عندكم استعداد لتغيير رأيكم في حالة إن كلامي كان مقنع و يستاهل التفكير و املوافقة عليه
أنا عن نفسي و برغم الاستماته الحالية على رفض التعديلات كنت محتار جداً من 5 أيام فاتوا تقريباً .. و ساعتها قررت إنني احسبها و آخد قراري بالنظر للمخاطر و السلبيات .. و قلت إن اللي سلبياته و خطورته أقل هو اللي هاختاره .. و ف نفس الوقت كان لازم أسمع الخبراء و الرموز و القوى السياسية كلها لأنهم متمرسين في السياسة طبعاً اكتر مني مليون مرة .. و أحاول أنوّع و بقدر الإمكان أجنّب أي حد أشك إنه صاحب مصلحة شخصية بنى عليها اختياره
و لما لاقيت إن اغلبية الرموز و الخبراء وا قوى السياسية و الشخصيات العامة ضد التعديلات قلت طيب .. إيه بقى مشكلة الموافقة على التعديلات للي خلت كل دول يتحدوا ضدها؟؟
لاقيت اللي بيقول إن كده الرئيس القادم هيبقى ديكتاتور جديد بسبب الصلاحيات اللانهائية اللي في الدستور .. و قالوا إن كده مجلس الشعب هيكون مجلس ضعيف لا يمثل الشعب و بواقي الحزب الوطني المحروق و جماعة الإخوان هيسيطرواعليه و مافيش وقت لقوى الثورة إنها تنظم نفسها ....... جميل أوي .. آراء منطقية و مقنعة جداً .. بس أنا لم أكتفي بالكلام ده و بدأت أفكر شويه ..
بعد رحيل مبارك بكام يوم بدأ الكلام عن الدولة اللي نفسنا تبقى موجودة و النظاما لسياسي اللي نتمناه .. و أعداد كبيرة من المحللين و الخبراء و الرموز السياسية اقترحوا مجموعة حاجات و يكادوا يكونوا اتفقوا عليها و منها :
- مطلوب تغيير نظام الدولة من جمورية رئاسية لجمهورية برلمانية
- مطلوب إعادة النظر في وجود مجلس الشورى من الأساس و إنه مالوش لزمه
- مطلوب النظر في نسبة العمال و الفلاحين في البرلمان و كوتة المرأة برضو
الله !! .. طيب و بعدين؟؟ .. ده الكلام ده متفق عليه بين حتى اللي بيقولوا لا للتعديلات و اللي بيقولوا نعم .. الله !! .. طيب إيه يعني!
مش الكلام ده المفروض يتظبط و يتجهز الأول قبل أي انتخابات ولا إيه؟؟
ده طبعاً غير بعض الملاحظات على التعديلات المقترحة حالياً أصلاً !
إزاي طيب هننتخب مجلس شعب و بعدين نطلب منه يختا رناس يعملوا دستور جديد بيقول إن المجلس تم انتخابه على أسس مرفوضه و هيتم تغييرها؟!
إزاي طيب هننتخب مجلس شورى و بعدين نقول له : لأ .. شكراً .. خلاص ز. اتضح إنك مالكش لزمه .. باي باي يا حلو !
إزاي طيب يتم انتخاب مجلس الشعب في وجود نسبة العمال وا لفلاحين و كوتة المرأة و بعدين نقول لهم شكلوا لجنة تقول في دستور جديد إن وجودكم مرفوض و غير شرعي ؟؟!!
إزاي طيب ننتخب رئيس و بعدين نقول له : شوف يا ريس .. إحنا عايزين نشيل منك معظم صلاحياتك و يشاركك الحكومة و البرلمان في الحكم بقوة و احتمال تبقى رئيس شرفي .. شوفلنا كده لجنة عملية تصيغ عملية قصقصة ريشك دي يا فخامة الرئيس !!
يا نهار أبيض !!
أنا كنت إزاي محتار بين نعم و لا؟؟ .... لا و "نو" و "تؤ" و أبداً كمان !!
بس حاولت أمسك نفسي و أشوف المؤيدين إيه وجهة نظرهم .. و لاقيت كلامهم منحصر في:
1- نعم معناها عودة الاستقرار
2- نعم معناها رجوع الاستقرار
3- نعم تؤدي إلى .. الاستقرار
4- نعم معناها إن الجيش يسيبنا و يمشي بسرعة
بس كده؟؟؟ .. طيب مين بقى اللي قال إن الاستقرار = نعم و نعم = الاستقرار ؟؟
هل كل اللي انا قلته ده فيه أي نوع من أنواع الاستقرار؟
هل الاستقرار إن كمية الاحداث دي تحصل .. و هل كل ده هيحصل بسرعة بحيث إن الجيش يمشي بسرعة زي ما بيقولوا؟؟
ده الاستقرار اللي بيقولوا عليه :
- استفتاء تعديلات
- انتخابات مجلس شعب
- انتخابات مجلس شورى
- انتخبات رئاسة
- انتخابات محليات
- انتخابات لجنة تغيير الدستور
- استفتاء الدستور الجديد
استنى استنى .. دي مجرد البدااااية .. عارف ليه؟ ... عشان لو تم فعلاً و بقينا جمهورية برلمانية و لغينا نسبة العمال و الفلاحين و كوتة المرأة و كل حاجه عليها كلام في الدستور .. ساعتها هيبقى كل اللي تم ده باااطل .. مجلس شعب وشورى و رئاسة وكله
هتقول لأ مش باطل؟
طيب لا انا ولا انت خبراء قانون و دستور .. بس أنا كلامي قاله ناس خبراء .. و هافترض إنهم غلط .. أو صح ... طيب إحنا ليه ندخل نفسنا في المتاهة؟؟ ليه بالله عليك؟؟
حد يبني عمارة من غير أساسات و بعدين بعد ما يخلصها يكتشف إنها مهددة بالخطر عشان مافيش أساسات ففيضطر إنه يهدها عشان يحط الأساسات ؟؟
ليه طريقة "ودنك منين يا جحا" ؟؟
ول يه نرضى بالفتافيت و الحلول الجزئية الغلط؟؟ .. إزاي نهد نظام كامل بكل جبروته اللي كان و نيجي على الدستور و نرقع فيه؟؟
أقولك حاجه ممكن تستغربها؟ .. أنا حاسس إن الجيش غلط غلطة و ورط نفسه و مش عارف يعمل إيه .. أو قال لنفسه خلاص بقى خلي الشعب يختار .. و ياريته عمل كده بطريقة صح و أعطى فرصة للشعب إنه يفهم .. لأ .. فيه ناس كتير هتقول نعم عشان طول عمرها بتقول نعم .. و ناس كتير هتقول نعم على أساس إن الدستور كان وحش و التعديلات هتخليه حلو و أهو كل اللي ييجي بعد الثورة كويس ! ... بصراحة غلطة مش هانساها للجيش مع كل حبي و تقديري لإنقاذه لمصر و دعمه للثورة.
أنا فعلاً مش فاهم إزاي يسقط الدستور سياسياً و قانونياً و بعدين نرجع نعدّل فيه ! .. إزاي اكتب في ورقة شوية كلام وب عدين أرميها في الزبالة بمحض إرادتي و بدل ما أكتب في ورقة جديدة على نضافة أخرج الورقة القديمة من الزبالة و أشطب و أعدّل فيها؟؟
الكلام كتير أوي في اتجاه رفض التعديلات .. بس اللي كتبته فوق ده كان كافي بالنسبالي إنني أرفضها بشدة ... أتمنى بجد لو إنت بتقول نعم للتعديلات إنك تعيد النظر و تحسبها تاني و تقول لأ ...
و أتمنى من اللي لسه محتار يكون قرر و اقتنع برفض التعديلات
و أتمنى من الرافضين للتعديلات انهم ينشروا النوت .. يعملوا تاج لصحابهم الموافقين على التعديلات .. و يحاولوا يكلموا الناس بسرعة قبل فوات الأوان
عاشت مصر حرة
ليست هناك تعليقات:
إرسال تعليق