مرة كنت باتكلم مع واحد صاحبي .. و بعدين روحت رازعه سؤال مفاجئ: تيجي معايا ننتخب؟
قال: بأمارة إيه آجي أنتخب؟ .. ما الانتخابات كده كده هتتزور و حزب الحكومة هيكسب .. يا عم دي بلد بنت
... !!!!
قلت: بص .. ما اقدرش اقولك انه مافيش تزوير .. بس اقدر اقولك اننا نقدر نمنعه أو نقلله لو كلنا روحنا ننتخب .. لو كنا ناخبين و في نفس الوقت عاملين قلق للناس اللي بيزوروا .. احنا 85 مليون و اللي من حقهم التصويت اكتر من 40 مليون .. تفتكر ممكن يزوروا إرادة 40 مليون لو قالوا لأ لحزب الحكومة؟! ... انت عارف يعني ايه تزوير؟ .. يعني يوقعوا قصاد اسمك في الكشوفات اللي عندهم و بعدين ينتخبوا بدل منك .. يعني بياخدوا حقك و انت نايم على ودانك .. يعني بيقولوا انك عايز فلان و انت اصلا قاعد في البيت بتشتم فلان ده ! .. انت اللي اديتهم الفرصة..
قال: أصلا أنا ماعنديش بطاقة انتخابية
قلت: كفاية إثبات شخصية زي البطاقة مثلا عشان تنتخب .. عادي جدا
قال: أنتخب مين؟ .. أنا ما اعرفش حد من المرشحين اصلا
قلت: حاول تعرف معلومات عنهم .. اسأل جيرانك .. و النت ماخلاش حاجه .. دوّر على النت .. و لو ما لاقيتش حد يستحق روح بوّظ صوتك
قال باندهاش: ايه ابوّظ صوتي دي؟
قلت: تروح عادي جدا .. تاخد الورقة اللي بتختار فيها المرشحين و تختار اكتر من العدد المسموح ... او تشخبط فيها او ترسم .. كده هيبقى صوتك باطل و في نفس الوقت انت روحت و وقعت في الكشوفات .. يعني ماحدش هيقدر يزور صوتك بسهولة
قال: والله فكرة ... طيب هو احنا المفروض بنختار كام مرشح أصلا؟
قلت بحماس: شوف يا سيدي .. انت هتدخل اللجنة و معاك البطاقة بتاعتك .. الراجل المسؤول هيتأكد من شخصيتك و بعدين هيديك ورقتين .. واحدة للمرشحين العاديين .. و واحدة للكوتة بتاعت المرأة ... كل ورقة فيها اسامي المرشحين و رموزهم .. هتختار من كل ورقة اسمين بس .. بشرط .. واحد يكون فئات و واحد عمال ... يعني انت هتختار 4 مرشحين ... بتحط علامة صح واضحة قصاد المرشح اللي انت عايزه
سكت صاحبي شويه ... فقلت : .. الموضوع بسيط يا ابني و مش محتاج تفكر .. طيب هاسألك سؤال .. انت خسران حاجه؟
قال: لأ .. بس يا عم الواحد حاسس ان كله تمثيل في تمثيل و اللي هما عايزينه هيحصل في الآخر
قلت: طيب و افرض .. طالما انت مش خسران حاجه .. ما تجرب تعمل حاجه تحترم بيها نفسك على الاقل .. حاجه ايجابية .. و يمكن ما يطلعش الموضوع تمثيل ولا حاجه .. و حتى لو تمثيل .. انا عن نفسي مش مستعد اسيب صوتي يتزور
انت عارف مين اللي بيروحوا الانتخابات طول السنين اللي فاتت دي؟ .. الناس الغلابه اللي بينتخبوا اللي بيوزع عليهم بطانيات و فلوس و لبس و ينور لهم الشارع و يشغل ولادهم في موسم الانتخابات و بس .. لكن لما واحد زيك و زيي متعلم و طالب في الجامعة و بيقرا و عارف ان مجلس الشعب اكبر من مجرد بطانية و شوية هدوم .. ساعتها ممكن يحصل فرق
و بجد .. لما يبقى ليك صوت .. هيبقى ليك قيمة .. مش مطلوب منك تطلع في مظاهرة ولا اعتصامات ولا اضرابات .. مطلوب تروح تعمل علامة صح قصاد اسم .. يمكن تكون بداية للتغيير .. و مش هتخسر حاجه
ليست هناك تعليقات:
إرسال تعليق