من فساد قطاع الإسكان في مصر

أنا مش هاتكلم عن حاجات سمعتها او قريت عنها أو حصلت لحد اعرفه ..

انا هاتكلم عن حاجة حصلت معايا شخصياً ..

في يوم من الايام ليس بالبعيد أبويا اشترى قطعة أرض صغيرة في مدينة الشروق زي عائلات كتير في مصر ما بتعمل كده في السنين الأخيرة ... تقعد تحوش طول عمرها بعد السفر بره مصر ثم العودة ثم الكفاح عشان لقمة العيش .. و بعد عشرات السنين اللي ربنا بيكرمه و يحوش شوية فلوس .. بيروح شتري قطعة أرض "يختلف مكانها و مساحتها حسب القدرة المالية للمشتري" .. يبنيها واحدة واحدة على مدى سنين .. عشان يوفر لكل عيل شقة يتجوز فيها .. و يبقى بيت للعيلة و مساعدة من الأهل للعيال اللي جم في زمن و بلد كلنا شايفين حالتها البائسة ..

أبويا كان موظف في وزارة المالية .. موظف شريف لا بيعرف يسرق ولا يرتشي ولا حتى يتغاضى عن أخطاء عشان يكسب علاقات قوية تفيده بعد المعاش ..

تدرج في المناصب .. مسك مناصب قيادية على مستويات مختلفة .. و كان مكروه من الموظفين المتكاسلين أو الفاسدين أو اللي لا مؤاخذة "حمير لا يصلحوا للشغلانة أصلاً" ...

وصل لدرجة وكيل وزارة .. و طلع معاش من كام سنة .. خرج من المنظومة القذرة دي و الحمد لله لا كسب مليم حرام ولا سكت عن خطأ او فساد ..

طول عمره بيفكر في مستقبل العيال و بيشتغل عشان يقدر يحققلهم حاجة تساعدهم في بلدنا الجميلة بلد الظلم و الفساد .. قرر يحط كل فلوسه تقريباً في شراء قطعة أرض صغيرة في مدينة الشروق و يبنيها و يشطبها ..

اشترى الأرض .. خط التراخيص و بدأ خطوات البناء ( و مش محتاج أحكيلكم عن بيروقراطية المصالح الحكومية في استخراج التراخيص و خلافه .. خلونا في التقيل اللي هاقوله في السطور الجايه ! ) ..

أول خطوة إننا عايزين نحدد أبعاد قطعة الأرض بالظبط عشان نبدأ نبني صح .. لأن المنطقة جديدة و فاضية فمافيش مباني قائمة تقدر تحدد على أساسها أبعاد القطعة بتاعتك ..

جه مجموعة تبع المقاولين العرب .. المفروض شغالين الشغلانة دي بالتنسيق مع جهاز مدينة الشروق .... بصوا على المكان .. و قالوا لأ مش هنحدد الأبعاد .. الموضوع صعب !

بلغنا الجهاز .. فبعتولنا واحد المفروض إنه بتاع مساحة (الله أعلم بقى مهندس ولا مساح ولا حلم و هو نايم إنه بيفهم في المساحة !)

المهم .. جه البيه .. عمل حركاته و قياساته و قالك الأبعاد هي كذا ..

لحد كده الحياة جميلة .. بدأنا نصب الخرسانات على أساس الأبعاد اللي البيه حددها .. لحد ما خلصنا سقف الدور الأرضي و عمدان الدور الأول كمان و الحمد لله ..

هل مصر بلدنا تسيبك تحمد ربنا و انت مرتاح؟ ... لأ طبعاً .. لازم يطلعلك الخازوق الوسخ المعتاد من دولتنا الجميلة ..

فجأة يطلع قرار إزالة .. ليه يا عم؟؟ .... قالك قطعة الأرض بتاعتكم مش متحدد أبعادها صح .. الأبعاد مايلة .. فأخدتوا جزء من الأرض اللي جنبكم !

يا عم و احنا مالنا .. ده الراجل بتاعكم اللي حدد الأبعاد دي !

ماليش فيه .. الغلط من عندكم !

يا جدع الغلط من عندنا ازاي ؟!

خلاص اكتبوا مذكرة و ربنا يسهل !

الكلام ده كان في مارس 2011

إحنا النهارده في يناير 2014 ... و لسه الوضع على الأرض زي ما هو .. صحيح أمر الإزالة حبر على ورق الحمد لله .. بس مش قادرين ندق مسمار في المبنى أو نعمل خطوة في عملية البناء .. و أسعار مواد البناء خلال الفترة دي تضاعفت .. حديد و اسمنت و طوب و خلافه ..

إيه اللي حصل خلال ال3 سنين ؟

نقدم مذكرة لجهاز مدينة الشروق .. فالجهاز يعمل لجنة .. فاللجنة تطلع قرار .. فالقرار يدخل لجنة تانية .. فاللجنة تبعت لرئيس المش عارف إيه .. فرئيس المش عارف إيه يقول نبعت بقى ناخد رأي هيئة المجتمعات العمرانية .. فالهيئة تعمل لجنة .. و اللجنة اجتماعاتها يوم الأربع بس .. و الأربع ده أجازة .. يبقى الأربع اللي بعده .. الأربع اللي بعده ييجي .. و ما تعجبهمش توصية الجهاز ... فيبعتوله تاني .. فيرد عليهم .... و هكذا ... !

طيب و احنا وضعنا إيه ؟
إحنا لازم نتابع كل ده ... لازم أبويا اللي على المعاش و بحكم السن مجهوده بقى أقل .. لازم يلف على الموظفين في الجهاز .. و في الهيئة .. و يطلع سلالم .. و ينزل في اسانسيرات .. و يتحايل على ده .. و يزن على ده .. و يزعق مع ده .. و يهدي الجو مع ده ... عشان بس ينجزوا في عرض الموضوع على لجنة ولا إصدار قرار في نقطة معينة !

و معاه في الرحلة صاحب الأرض التانية المتضرر من اللي حصل ... نفس الحواديت ... أرضه باظط و طار نصها تقريباً .. و حتى الآن لا قادر يبيعها ولا قادر يبنيها ولا اخد تعويض مادي أو أرض بديلة ..

المهم ..

وصلنا أخيراً و الحمد لله لقرار من الجهاز .. مبنى على كل المراسلات و المحادثات دي سواء جوه الجهاز نفسه أو مع هيئة المجتمعات العمرانية ..

القرار هو منح صاحب الأرض التانية المتضرر من اللي حصل أرض بديلة

و شراءنا الجزء اللي اخدناه بالغلط  بعد تسعيره ( لاحظ إنها مش غلطتنا أصلاً .. بس ده مال عام يا سيد ولازم تدفع!)

بعت جهاز المدينة القرار لهيئة المجتمعات العمرانية .. و هنا كانت الصدمة :

الهيئة رافضة القرار .. و بتقول ما ينفعش و احنا اللي غلطانين و مافيش حاجة اسمها أرض بديلة للمتضرر !!

جدير بالذكر إن الشخص اللي تسبب في المشكلة دي كلها بفشله و غباءه و عدم تقديره للمسؤولية ... مش أول مرة يعمل كده .. بشهادة زمايله.

أنا خلّصت القصة .. مش هاربط بينها و بين السياسة لأن خلاص ما بقاش في كلام جديد يتقال ..

بس ممكن اتكلم عن الشخص اللي نزل و حدد بنفسه أبعاد الأرض غلط و تسبب في كل المشكلة دي ..

و الأشخاص اللي بيمشّوا كل حاجة بالروتين الحكومي الوسخ و مش بيكتفوا بكده .. لكن بيضيفوا عليه غباءهم و تكاسلهم و ظلمهم الشخصي للبشر كمان !

عايز أقولهم و اقول لأي حد بيشتغل شغلانة بتأثر على حياة بني آدمين غيره :

ما تتوقعش إن حياتك تبقى جميلة .. و عايش عيشة كويسة .. وانت بتظلم الناس بشكل يومي و يتخرب حياتهم ..

بتستغرب أوي من الدنيا و تقول "هي ملطشة معايا كده ليه؟" ! ... ملطشة معاك عشان انت ظالم .. بتتسبب بشكل مباشر و غير مباشر في تخريب حياة غيرك .. و تضييع عمرهم بين مكتبك و مكتب زميلك و مكتب مديرك ..

ما تستغربش لما تروح مصلحة حكومية ولا مستشفى ولا أي مكان انت فيه "زبون" .. و هناك يستلموك زي ما بتستلم باقي البشر و انت قاعد على مكتبك !

شوف كام واحد بيدعي عليك .. و كام واحد حياته بتخرب بسببك .. و كام واحد بيصاب بأمراض الدنيا بسببك .. و كام واحد فلوسه بتضيع بسببك !

انت فاسد .. زي الفاسدين الكبار .. بس انت حمار .. لأن الفاسدين الكبار بيكسبوا من ورا فسادهم ... إنما انت كل اللي بيطولك هو الخسارة .. خسارة في الدنيا ..  وخسارة في الآخرة.

كل اللي طالبه من أي حد بيقرا هو نشر الحكاية .. و نشر كل حكاية بتحصل معاه و بتكشف الفساد و العفن اللي معشش في المصالح الحكومية ..

الفساد مش لازم يبقى فساد مالي و رشاوي و اختلاسات ... الفساد الإداري موجود .. و أخطر .. لأنه مالوش عقوبة !